Pasadan ostegunean, Euskal Kirol Federazioen Batasunak (EKFB), bere lehenengo gala ospatu zuen. Hainbat dira egun hauetan ospatzen diren kirol galak baina EKFBk homenaldi txiki bat egin nahi izan zion euskal kirol federazioei ekitaldi honen bitartez. Horrela, federazio bakoitzeko saridun bat izan genuen eta federazio bakoitzeko presidentea banatu zuen sari bakoitza. Horrela, Itziar Bustamantek, EHSF presidenteak, nazioarte mailan daukagun surflaririk bikainena saritu ahal izan zuen, Enelo Acero bera. Poz pozik agertu zen getxotarra eta jadanik 2009ko sasoialdia prestatzen dabilela aurreratu zigun, jarraian Brasilerako bidea hartzen zuelarik. Zorte on opa diogu aurten ere, beti bezala, sari ugari batzea espero dugularik.